مصطلحااات تهبل وتظحك مررررة ))

نخش الموضوع على طول

مطلحات :

الدلخ :

وهذاا إنسان غبي جداااا.ويرفع الضغط ....وينرفز ....
واكثر من يعااني منه المدرسين ....واهله.

المنسم :
ذلك راجع إلى تهريب الهواء من رأسه و السبب
في ذلك هو أن في رأسه فتق لذلك تلقاه دايم يغطس رأسه
في سطل موية عشان يعرف من وين التنسيم .

المهوي :
هو مرحلة متأخرة من التنسيم و المهوي وصل لمرحلة متأخرة جدا
بحيث يفقد أهله الرجاء منه ...

الشخر المخر أو أبو مشخر ! :
من نفس فصيلة المنسم !

السلنتح :
قليل الأدب

جحلط ( بتشديد اللام ) :
وهم مرحلة متقدمة للسلنتح

مزّلب :
يعني بايعها بتراب !

مسفّح :
يعني طاير في العجّة وهو ما عنده ما عندي جدتي
يعني بالعربي الفصيح من جنب العارضة

الستيمة :
وهو الشخص اللي ماعنده ماعند جدة جدتي ...!!...
ويصدق أي شيء يقال له

المسبة :
هو الشخص اللي يكون مروع في صغره لدرجة أنه يصبح شبه فاقد للعقل ...

الفاهي :
هذا الله يخلف مهما تقول له أو تصارخ عليه تلقاه فاتح فمه و بس
و إذا كلف عمره و تفاعل معك رد عليك و قالك : هه ...

الحقنة :
هو الشخص الغثيث اللي ما يفكك لين تعطيه اللي يبيه منك
و مهما تسوي له عشان تصرفه عن الموضوع حقه ينشب في حلقك
لين يأخذ منك اللي يبيه , وهذا يفسر قول العرب : أغث من حقنة !!....

العلة:
هذا اللي ما تأخذ أنت منه أي شيء و لا عنده استعداد
انه يسمع منك مهما حاولت وهو كالمرض يعلك لين تنفقع مرارتك منه......

العربجي :
يظن معظم الناس أن العربجي هو الشخص الشديد
حق المشاكل و اللي ما يمشي إلا وهو مشخص ببنت البكار
( أسم لطريقة لبس الشماغ عند العرابجة )
و حاط مفاتيحه في سلسلة و لا بس نعال سجاديه و يسحبها تسحيب
لين جاء يمشي و دايم فاتح صدره و رازه على فوق
و كانك ولد أبوك قله شيء بس .

المرجوج :
هذا ما عمره صلح شيء صح في حياته ما يمديك تفتح فمك
إلا و طار في العجة بدون ما يفهم وش السالفة
و الارتجاج الحاصل له يختلف تماما عن مشكلة المسبة أو المسبوة
حيث يكون الارتجاج هنا نتيجة صدمة و ليس نتيجة روعة .

المطفوق :
من فصيلة المرجوج ...
إلا أن مايميزه هو انه اذا مر من عند كاس أو جيك أو ابريق أو أي شيء
فيه سائل لازم يكبه ( أي يسكبه ) برجله وهو مايدري

ولا تخليه يمر بجنبك وانت معك صينية فيها بيالات لأنه لازم يطقها بيده أو بكتفه ..!!
أيضا لاتخليه يصب قهوة لضيوف لأنه لازم يكب القهوة على ثوب واحد منهم..!!!!!.....

السربوت :
هذا اللي ما يخلي مكان ما يروح له
و قد كان الأولين يطلقون لقب السربوت على من يشرب الدخان
لكن الحين الله يخلف الناس تدخن بيديها و رجليها و لحد يقول لهم شيء.

السمرمدي :
وهو من نفس فصيلة السربوت.

الداشر :
هذا قليل الأدب و لا يحب يماشي إلا السرابيت
و إذا قيل فلان دشر فلان أي خرب أخلاقه لكن في الأردن
الشقيق كلمه دشره تعني أتركه..

الملكع :
أما هذا فيعرف حتى السكني (اي الجن )
و مقطع السمكة و ذيلها و مهما تحاول تلف و تدور معه تراه
فاهم و عارف وش تبي بالضبط فلا تتعب نفسك .

المصرقع :
هو كل شخص ما يهمه شيء و اللي يطري على باله بيسويه
لأنه ماخذ الدعوة سعة صدر و هبال ...

المفلت :
هو كل شخص ما تقدر أنك تأمنه على شيء
لأنه مهوب تكانة و يتميز بكل أنواع الإهمال و التطنيش....

الخكري :
ببساطة الخكري = نعومة + دلع >>

اللزقه:
هذا الشخص اللي على طول معك وقدامك ووراك وكل شي
وتطلع مع الباب تلقاه تركب في السياره تلقاه يطق القزازه وهاكذا.

الصديع :
اي كلمه في راسه يطلعها ولا يتنباء بأفعاله سواء كانت صح ام خطء .

الجنط :

من فصيلت الدلخ.

المريوح:
هذا اللي نفسه شينه .

الزااااااحف.
.إنسان آخذها عرض مبسوط ويبسط من حوله سريع البديهه ولايفوته شئ..

والخرس..
من نوع الكمخه والفاهي يقول إيه وهو مايدري وش السالفه..

الطبله.
.باااااااااارد من كثرة الغباء..

الأرفل..
من نوع المطفوق يعني لاتقرب له ولاتخليه يقرب لشئ وخصوصا الاعمال الدقيقه لأنه ماينفع فيها..

المسلس..
هذا المصكه واللي ماتدري وش وراه تشوفه تقول أتلى الأجاويد وهو وراه بلاوي..

الرجه..
مصرقع مايجي بمكان الا ويرجه بصوته على غير سنع..

المسكت.
.هذا اللي مابعده مسكت بتشديد الكاف..

المهفه.
.هذا كلمه توديه وكلمه تجيبه..

اللوح.

.يعاند على غير سنع..

الكرتون.
.تحسه غبي على السليقه لاتكلمت معه تقول من وين جاي هذا.
.

الشراره..
هذا مايجي بمكان الا والمصايب وراه يتسبب على من حوله بالقرادات..

المقرود..
كل شئ متسلط ضده يعني مقرود حظ

الأصلي.
.هذا من نوع المسكت..

المنتهي..
مابعد النهايه شئ بايع كل شئ لو تقوله أي شئ ماقال لا..

القاضي.
.حول المنتهي ماهو بعيد عنه يعني تقول من عيال عمه..

الخالص..
حول الدعوى ولد خالهم..

المولي..
هذا يقرب لهم بس من بعيد شوي..

المدحدر..
هذا من عيال جيرانهم حاول يحتك بهم طردوه

المطنوخ..
هذا تحطه على يمناك يعني تعتمد عليه..

الإكه..
هذا اللي تصرفاته صح ويعلمك وش تسوي لاتوهقت بشئ..

الداج..
داج وش معناها يعني ؟؟ داج بالمال والتفكير يعني الله يخلف..

القفل..
هذا اللي مافيه امل يفهم لو تقعد تشرح له من هنا للسنه الجايه..

الطرمبة
من فصيلة الدلوخ

الفدغ أو الافدغ ......
من يحاول يستخف دمه ويبيك تضحك غصبا عنك
واذا ما ضحكت من بلاهته يضحك هو الين تحس ان الشي اللي سواه من جد مضحك

ان شاء الله فادتكم المصطلحات ونلقاكم بعدين مصرقعين عربجيين ومهبولين

بالتوفيق لطريق الصرقعة

تحياتي صرقع المصرقع صرقع للدنيا تصرقعلك

يسلموووو
دااااائمااا الا بداااااااااااااااااااااااااااااااع

مشكوووووووورة

» لمبرجيني مورسيلاجو بأضوية زينون تهبل ولا في الاحلام مررررة حلوه
» نــكــت أغبياء+محششين +أطفال الخ .. ههع جديده وتظحك ههه أكثر من100نكتهـ
» لو مررررة في حياتك
» ديكورات مررررة حلوة
» انشودة انت عوني مررررة حلوة