قصيدة طعم الأنوثه
لبيه يا طعم الأنوثه وسكّّرة شاي الحياه
لبيه جيتك والوله يسبقني مره واسبقه
يا ماء وجه(ن) للنسا يا وجه أنس(ن) للمياه
يا محببه جمر الشفاه بمزن ريق(ن) يشرقه
تحذير ثغرك م التبغ يودي الى نقص الوفاه
يا قاطعة رزق التعاطي والأمور الخانقه
من يدمنك وده يعيش بعافيه لا منتهاه
واللي يشوفك بك تعلق خاف قلبه يحرقه
يا أكسجين(ن) للحياة اليابسه قبل المياه
اتذوب أنفاسك في يمي عنصرك دمي اسرقه
لبيه من قاصي الرموش الذابحه ذبح الطغاه
لبيه لى أترف وسادات الخدود المورقه
جمر الشفاه يروق لي أقبل أببرد في دفاه
يا حارقة دم انصهار الثلج عضي المشنقه
يا مترفه مجنونكي داءه ترا هوه دواه
مجنون بك حد الثماله والشعر خذ مابقه
شاعرك أنا يا آنسة جنس اللطافه والرفاه
شاعر مفوّه تنحنيله كل جمله منسقه
شاعر ومتربع على عرش القصيد وما علاه
ويزيدني تاج الجمال ان قلتي انتي اعشقه
لبيه يا صوت(ن) دعاني بحته تقمع صداه
صوت(ن) يذوب كل صلبن لا تبادى رونقه
لبيه يا طعم الأنوثه وسكّّرة شاي الحياه
لبيه قلبي تحت امرك معه روحي مرفقه